Star5. போபால் விபத்தில் பலியான அப்பாவிகளுக்கு ஓர் அஞ்சலி!

இன்றோடு 23 வருடங்கள் நிறைவடைந்து விட்டன. தமிழ் இணையத்தில் இன்று எழுதும் பல இளைஞர்கள் இது பற்றிய முழு விவரங்கள் அறிந்திருப்பார்களா என்பது கூட சந்தேகமே.

1984 ஆம் ஆண்டின் டிசம்பர் 3 அதிகாலையில் யூனியன் கார்பைட் தொழிற்சாலையிலிருந்து கசிந்த 40 டன் மித்தைல் ஐஸோசயனேட் ( Methyl Isocyanate) என்கின்ற விஷ வாயு கிட்டத்தட்ட 2500 முதல் 5000 பேர் ஒரே இரவில் பிணக் குவியலாக மாற்றிய தினம் இது.(8 லட்சம் பேர் வசித்தனர் போபாலில் அப்போது)





<

மேலும் 20000 பேர் படிப்படியாக இதன் தாக்கத்தால் பாதிக்கப் பட்டு மடிந்தனர் மற்றும் 2 லட்சம் பேர் இந்தக் கசிவால் பாதிக்கப் பட்டதாக ஆய்வுகள் கூறுகின்றன.

இன்றும் கூட மருத்துவமனைகளில் கூட்டம் கூட்டமாக மக்கள் பார்வைக் கோளாறு,நுரையீரல் கோளாறு,சிறுநீரகக் கோளாறு, மலட்டுத்தன்மை,நோய் எதிர்ப்பு சக்தியின்மை போன்ற வியாதிகளால் அவதிப்பட்டு வந்து குவிந்த வண்ணம் உள்ளனர்.

இந்தியாவில் காசநோய் உள்ளவர்களது சராசரியை விட நாலு மடங்கு அதிகம் சராசரி போபாலில் இன்றளவும் நிலவுகிறது




யூனியன் கார்பைடு கம்பனி மீதான கிரிமினல் வழக்கை முன்னெடுத்துச் செல்ல முடியவில்லை.ஏனென்றால் அந்தக் கம்பெனியே தலை மறைவானதும் அதற்கெதிராக இந்திய அரசு வலுவாக செயல் படாததும் ஒரு புறமென்றால் அந்த கம்பனியை 'டோவ் கெமிகல்ஸ்' என்ற கம்பெனி வாங்கி , இந்தியாவில் மேலும் முதலீடு செய்ய திட்டமிட்டிருப்பதும், அம்பானியின் ரிலையன்ஸ் அவர்களுடன் கை கோர்ப்பதும், ரத்தன் டாடா போன்றோர் ஆதரவு தருவதும் என்னவென்று சொல்ல?

யூனியன் கார்பைடின் அப்போதைய தலைவராக இருந்த வாரன் ஆண்டர்சன் இன்றும் அமெரிக்காவில் சுக வாழ்வு வாழ்கிறார்.விஷ வாயு (இரசாயன)ஆயுதங்கள் வைத்திருப்பதாக சந்தேகப் பட்டதின் பேரிலேயே ஈராக் நாட்டையே துவம்சம் செய்து சதாமை தூக்கிலேற்றியும் ஓயாத அமெரிக்கா வாரன் ஆண்டர்சனை விசாரணைக்காக இந்தியாவிற்கு அனுப்ப மறுத்தது எந்த ஊர் நாட்டாமையோ தெரியவில்லை.

இந்தியா கல்கத்தா டெஸ்டில் ஜயிக்குமா ஜயிக்காதா , நடிகை காவேரியை காமெரா மேன் வைத்தி ஏமாற்றினாரா இல்லையா என பதை பதைக்கும் ஊடகங்களுக்கு போபால் பற்றி அந்த நிகழ்வு, நினைவு, சோகம் மற்றும் படிப்பினை பற்றி கூற இரண்டே இரண்டு நிமிடம் ஒதுக்க முடியவில்லை.ஏனென்றால் 23 வருடங்களுக்கு முன் இழந்த 22000 உயிர்கள் அவ்வளவு சுவாரசியமில்லை.

இதற்கெல்லாம் சிகரம் வைத்தது போன்ற விஷயம் "டோவ் கெமிகல்ஸ்" கம்பெனியின் சட்டவல்லுனர் அபிஷேக் மான் சிங்வி தான் போபால் விஷ வாயு கசிவிற்கு பிறகு அது சம்மந்தமாக பிரதம மந்திரி அலுவலகத்திற்கு அன்று சட்ட ஆலோசனைக் குறிப்புகள் கொடுத்தவர். ( இவர்களுக்கெல்லாம் மனிதாபிமானம் என்ற ஒன்றே கிடையாதா...எல்லாமே பணம் மட்டும்தானா ? )

இத்தனையிலும் ஒரு ஆறுதலான விஷயம் சென்னை மற்றும் மும்பை IIT மாணவர்கள் மனிதாபிமான அடிப்படையில் "டோவ் கெமிகல்ஸ்" வேலையை புறக்கணித்ததுமல்லாமல் அவர்களை கல்லூரி வளாக தேர்வுக்கும் வரவொட்டாமல் தடுத்து விட்டனர்.கான்பூர் ஐ ஐடியிலும் இது போன்றதொரு நடவடிக்கை பரிசீலிக்கப் படுவதாகவும் தெரிகிறது.

மனித வரலாற்றின் மிக மோசமான தொழிற்சாலை விபத்தில் பலியான 22000 உயிர்களுக்கு மெளன அஞ்சலி செலுத்தும் அதே வேளையில் இது போன்ற துயரங்கள் மேலும் நடவாமலிருக்க நம்மால் இயன்றதை செய்வோம் என்று இந்த நாளில் உறுதி கொள்வோமாக.